උතුරු මැද පළාත් වාරිමාර්ග දෙපාර්තමේන්තුව විසින් සංවිධානය කරන ලද “වාරි බක් මහ උළෙල – 2026” 2026 අප්‍රේල් 26 දින උත්සවාකාරයෙන් පැවැත්විණි. සිංහල හා හින්දු අලුත් අවුරුදු උත්සවයට සමගාමීව සංවිධානය කළ මෙම වැඩසටහන දෙපාර්තමේන්තුවේ නිලධාරීන් අතර සහයෝගීතාවය, මිත්‍රත්වය සහ සම්ප්‍රදායික සංස්කෘතික අගයන් තවදුරටත් වර්ධනය කිරීමේ අරමුණින් ක්‍රියාත්මක කරන ලදී.

මෙම අවස්ථාව සඳහා දෙපාර්තමේන්තුවේ සියලු අංශ නියෝජනය කරමින් නිලධාරීන් සහ සේවක මහත්ම මහත්මීන් විශාල පිරිසක් සහභාගී වූ අතර, සම්ප්‍රදායික අලුත් අවුරුදු ක්‍රීඩා රැසක් ඉතා උද්යෝගයෙන් පැවැත්විණි. කණාමුට්ටි බිඳීම, අලියට ඇස තැබීම, ලණු ඇදීම, කොට්ට පොර, බනිස් කෑම වැනි ජනප්‍රිය ක්‍රීඩා වලින් උත්සව භූමිය පුරාම සතුට සහ උද්යෝගය පැතිර ගියේය.

මෙවර බක් මහ උළෙලේ විශේෂත්වයක් වූයේ දෙපාර්තමේන්තුවේ නිලධාරීන් අතර සංවිධානය කළ සුහද ක්‍රිකට් තරඟාවලියයි. කණ්ඩායම් කිහිපයක් සහභාගී වූ මෙම තරඟාවලිය ඉතා උණුසුම් හා තරඟකාරී අයුරින් පැවැත්වූ අතර, ක්‍රීඩාශීලීත්වය සහ කණ්ඩායම් හැඟීම ඉහළ මට්ටමකින් ප්‍රදර්ශනය විය. ජයග්‍රාහී කණ්ඩායම් සඳහා ත්‍යාග ප්‍රදානය කිරීමද සිදු කෙරිණි.

එමෙන්ම, නිලධාරීන් සහ සේවකයින් අතර සුහදතාවය වර්ධනය කිරීම, මානසික විවේකය ලබාදීම සහ ආයතනික එකමුතුව ශක්තිමත් කිරීම සඳහා මෙවැනි වැඩසටහන් මහත් දායකත්වයක් ලබාදෙන බව මෙහිදී අදහස් පළ විය.

සියලු දෙනාගේ සක්‍රීය සහභාගීත්වයෙන් සහ කැපවීමෙන් “වාරි බක් මහ උළෙල – 2026” ඉතා සාර්ථක අයුරින් අවසන් වූ අතර, ඉදිරියටත් මෙවැනි සංස්කෘතික හා ක්‍රීඩාමය වැඩසටහන් සංවිධානය කිරීමට දෙපාර්තමේන්තුව බලාපොරොත්තු වේ.